ان شاء الله **بقلم سيد قيصر

الله لو شاء...
يخلينا هباء 
فبلاش كبرياء
واتنيلوا علي عينكم. 
بتتكبروا علي ايه... 
وطالعين فيها علي ايه.
فرحان انك بيه..
فرحان بكام جنيه
فرحان بعماره اوبها
وعربيه راكنه تحتها..
فرحان بكام بدله..
ياعبيط يابن الهبله
فرحان انك مشهور
بيكتبوا اسمك بالنور
وانتي فرحانه بشكلك
كلكوا صابكوا الغرور
طب خلوا الطابق مستور
دا انتم ضعاف قوي
قدام قدرة القوي.
طب اضعف من خيطه في بدله
واضعف من ورقة فلوس.
طب هديك الفين جنيه
واشكك كم شكه بدبوس
طب هديك ياسيدي مليار
واخد عنيك.
شفت الضعف اللي فيك
طب ليه تتكبر ليه تتجبر
ليه بتنسي الله اكبر
قادر ومقتدر ويقدر
ينسفنا. يحزفنا..
يمحينا بمحايه..
يامر بالنهايه.
وياريتها هتخلص علي كده
دا لسه حساب ونار كده
وخلود ياباشا للابد
وعذاب مهين صنع الصمد
بلاش تكبر وحياة ربك
مالك وجمالك واهلك.
ماهينفعوووووووك