خاطرة عن طريق الشّعر المحكي مهداة إلى صديقة الزّمن الجميل - هند الحسني، بعنوان: غراس يرويه الإحساس
في عيون الصّبح عيني بتلمحك
وبصير إنطر طلّتو تاصبّحك
والليل بتمنّى عتمتو تنتهي
حتى تجي ويرافقوك جوارحك
وماذكّرك إنّي كنت عم إنطرك
وبكلّ جهدي صير بدّي ريّحك
واتغافل جراحي وبوجهك ابتسم
واتجنّب الكلمة اللي ممكن تجرحك
ماهمّني شو النّاس بدهم يحكموا
بيهمني صدقك وصدقك فاضحك
هادي العبارة استخدموها للأذى
لكن انا رح وظّفا وفيها إمدحك
وكتير كنت اسألتني ويني أنا
ماجاوبك واليوم بدّي استسمحك
إنّك إنت كلّي أنا ، وكلّك إنت
مزروع في قلبي وقلبي بمنحك
لو يوم ردت تغيب عنّي وتبتعد
مع كلّ حبّي إلك منّي بسرّحك
د.شفيعه عبد الكريم سلمان
ليست هناك تعليقات:
إرسال تعليق