حَرَّكْ الشَّكْوَة.....قلم حميد النكادي

حَرَّكْ الشَّكْوَة..

مْخَضْ..ؤُ زيد مْخَض
حرك الشكوة
فرق اللبن من الزبدة
هَدَا مْنْ هَدا
ؤُ كُلْها مَداقُو فالطبلة
وَاشْ كِي عسل السكر
كي عسل شَهْد النحلة
واش كي الخيل البَرْكِي(ك=g)
كي سلالة البغلة
الدنيا واد حامل
هَازْ شَلُّا ؤُ شَلَا
حجر ؤُ طوب
ؤُ شْحال مَنْ جثة
النار صَهْد ؤ عوافي
ؤ شحال من واحد بْرَا
بالجمر ؤ شحال من كِيَّة
مْخَض..ؤ زيد مخض
دَخَّلْ يديك فالشكوة
ؤ دير النية
  دير السمن فجيه
ؤُ خَلِّي اللبن
ربما تْشْداكُو (ك=g)
ؤُ تْسوطْ فيه
قبل لَعْشِيَّة
حميد النكادي 18\7\2020