....... نفسي أتحرر ........
.................................
ليه زمانا ..... الملتوي
عايب ............. قوي
حط الأصيل ابن الأصول
رفع الفلاتي الفهلوي
ساب الغلابه مطحونين
دايرين في دايره
جوا دايره ومهمومين
نصب الكمين في الاورده
صرخ البطين ويا الأذين
الروح شتات في الأفئده
والدم مش عارف يمر
خيط الوفا بيكر
كل الوشوش
لبست رتوش الأقنعه
اللسان بقى طعمه مر
حتى الأغاني المفزعه
الغلب منها بيشر
والشر متكرر
نفسي أتحرر
من عادات الزور
ويعود أمان الدور
وابويا اللي كان داير
في الساقيه بدل التور
ماكانش يعرف في الحياه
غير أرضه .. وفرضه ..
وهدمته الكستور
وامي اللي كات
تشبه شعاع النور
من همها شابت
نادت ياكل الأنبيا
كنست عتاب والأوليا
ماتعيش زمان الأغبيا
والندر فول نابت
كات تصحى م الفجريه
شاطره كما الددبان
عجينها ع الطبليه
قبل الآدان بآدان
أصل المحبه زمان
في العيله واللمه
والقلب كان دفيان
بالخاله .... والعمه
والحب كان عنوان
لاهل البلد عامه
وبرغم كان الحال مفيش
ومفيش مجال للأمنيات
القلب كان يطلع له ريش
وكان بيطير م الإنبساط
.................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق