أمي قداش نحبك يا امي ..قلم بدر الدين أحمد

أمي
قداش نحبك يا امي
حبك ساكن روحي ودمي
واسمك كي العسلة في فمي

كي نشوفك بالي يرتاح
مني الغلطة ومنك السماح
علي تنادي كل صباح
على كتفي تطبطب وتضمي

إنتي لي ولدتي وربيتي
وسنين عمرك لينا عطيتي
لا طلبتي اجر ولا خذيتي
طول عمرك في الشمل تلمي

وربيتينا ملي صغار
ولينا ما تحبي الغيار
لو نحسب لي فات وصار
محال نعده ونسمي

حبك ساكن في جواجية
بلي نحكي عليك شوية
لو نهديلك الف هدية
منوفي حقك يا امي

لازم نسعى في مرضاتك
نبقى نحبك طول حياتك
والدعوة السمح في صلاتك
كي ترفع ايدك وتسمي

قداش نحبك يا امي

لاسهرنا تقعد تستنا
ودعواتك فيها نتمنا
و برظاتك ندخل للجنة
لا تعدي علينا لا تمني

علينا تعبتي طول ليالي
كي نمرض نلقاك قبالي
تدتي وتتوسل للعالي
وتبدى لصدرك فيا تضمي

قداش نحبك يا امي

على قرايتنا حرصك ديما
كل واحد يمشي لتعليمه
ماتقبل كان رتبا عضيمة
وبنصايح للعقل تنمي

قداش نحبك يا امي

في وجهك ديما البشاشة
ضحاكة ماشك مغشاشة
ولي ينعس تتديه لفراشه
وتبدي في كتبه تلمي

جبك ساكن بين ضلوعي
انت لي ضويتي شموعي
وكي نبك تكففلي دموعي
بالضحكة تخففلي همي

قداش نحبك يا امي

بالي كبرنا ديما صغار
على كلامك ما عنا خيار
عليك نصبح بالإستمرار
كان شكرت ولى تذمي

بالي نحكي بلي نعد
لميمه عزيزة بالمنجد
والله ما يضاهيها حد
بروحي نفديها ودمي

قداش نحبك يا امي

بدر الدين أحمد

هدية لجميع الامهات