ياللي ما صعبناش عليك...قلم السيد الشهاوي

ياللي ما صعبناش عليك

غنوه:للشاعر السيد الشهاوى

بعد ما ضاع العمر في بعدك
جاي لسه تقول باحبك
فكرتني والله بزمان
واللي كان بينا وكان
لما كنا صغيرين
واتولد الحب بينا جنين
اخدتني يومها بسمتك
رقتك... وضحكتك
كانت بتسبق ياحبيبي
خطوتك
وعيونك الحلوين
والورد في خدودك
بالف والف لون
دوبتني يومها في هواك
بنظره واحده من عنيك
وزي عصفور في الجنه
كانت تنام ايدي في ايديك
وشفت الدنيا لاول مره
نشوانه بترقص حواليك
       ★★★★★
وصحينا في ليله علي بعادك
وهجرك لينا وبعادك
وسنين عشتها انا في غيابك
ما بين وجدي واوهامي
ومبقاش باقي بينا غير ذكري
باعيشها في بعدي عنك
غصب عني
ياما اتمنيتك طيف يزورني
في احلامي
وضاع عمري وشاب شعري
مستني يوم قلبك يناديك
واتارينا كنا ...لعبه بايديك
        وباسالك
هو احنا ما صعبناش عليك
            ★★★★★
وجاي لسه تقول باحبك
عملت ايه الدنيا فيك
واللا الزمن مقدرشي عليك
لسه شايفك ذى ماانت
الايام بتغير فينا
وانت حبيبي ذي ما انت
برقتك....بضحكتك. ذي زمان
ويمكن احلي
اتعذبت صحيح في فراقنا
صدقني مش باين عليك
            ★★★★★
انا دلوقتي باقولك ابعد
غصب عني باقولك ابعد
قلبي في بعدك ما بقاش قلبي
وعرف اذاي يتعلم غدرك
وانا خايف ياحبيبي عليك
اخدك في حضني واسهرك
واسقيك غرامى. واحيرك
          ياللي إحنا ما صعبناش
                              عليك

              السيد الشهاوي