زاهيه و داهيه ...قلم الشاعر معوض حلمي

موثقة على مدونتي الشخصية
زاهية  وداهيه  قصة  كل يوم
الصراع بين النقيضين الخير والشر
...........................................

.........  زاهيه  و  داهيه  .........

.........................................

داهيه  ..

فينك  يازاهيه ، انا  قايده  ناري
قاعده     باغلي    لكن     باداري
البت   ساهيه   ماعرفش   مالها
وإيه   جرى   لها   غلب   حماري

زاهيه  ..

جيتك ياداهيه يشفي اللي فيكي
يابت    باضحك    أباي    عليكي
عارفاكي   ..  طبعا   ..  يابراويه
وحياة   عينيا    جايه   الاغيكي

داهيه  ..

البت    ساهيه    حالها    اتعوج
بقالها    فتره    سايقه     العوج
البت    ياختي    شافت   دلالها
عدلها    جالها   ،  شافت    فرج

زاهيه  ..

مالك   ياداهيه    لسانكي   زالف
هانروح في داهيه  وقلبي خايف
ماتسيبي ياختي البنات ف حالها
تشوف دلالها  ، ماحناش سلايف

داهيه  ..

ياختي   ياكبه  ،   عينك   ورانا
إوعي   تقولي   إن  انا   غيرانه
بس  ..  يعز  .. عليا  ..  يازاهيه
أختك .. داهيه ..تبات ..حيرانه

زاهيه  ..

ليه   تحتاري    وتشغلي    بالك
هما في حالهم وانتي في حالك
جايه  أفضفض  ليكي  ياداهيه
أختك .. زاهيه  .. وشها .. ذلك

داهيه  ..

طيب   شوفتي   بهانه   التيس
بتكلم   بعض  الناس  ع الفيس
قالوا  ياعيب   الشوم   نشروها
جايبه   لابوها   العار   يامغيث

زاهيه  ..

يابت الفيس دا شيطان ملعون
بيهد   بيوت   وبيعمي   عيون
وانا    تليفوني    زراير     بس
من غير كاميرا وشات مجنون

داهيه  ..

ياختي  انا  باسمع   هم  وناقع
حتى  عيال  الناس في الشارع
شايلين  محاميل وعليها بلاوي
تصاوير  للبت  وفيديو  مقاطع

زاهيه  ..

أحسن   حاجه   يابنت   الناس
إن   لساني   ماهوش   عساس
لازم    أصونه    وانقي   كلامه
عمري  ماسيبت  لجامه وداس

داهيه  ..

يابت     لسانك     ده     فرقله
قصدك   إيه    ماسكالي   الذله
غيرش صحابي يوماتي قالولي
عن     أخبار      الناس     القله

زاهيه  ..

عمري  مااصاحب  في الخناس
عمره  ماصان  إحساس  الناس
واحنا    غلابه   ياعز   صحابي
باسد   وداني   بميت    ترباس

داهيه  ..

بس   خلاص   بطلت   وتوبت
يلعن    ام     شيطاني     يابت
يلعن     ام      لساني    الزالف
يلعن    ام      الشات     والنت
........................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية