أنا المعلم
أنا اللي مسكت الطبشورة
وكتبت بإيدي على السبورة
ياما عانيت من جيرها
وصبحت على عيوني شبورة
تلاميذي عقولهم أرض فاضية
كنت ليهم ساقية وطمبورة
حضرت دروس
وشرحتها بالصوت والصورة
أنا اللي علمت
المستشار وأبو دبورة
والمهندس والمحامي والدكتورة
وصاحب المهنة ولاعب الكورة
ياما وقفت بين التخت
أحكي حكاية وأقول أسطورة
كان عرقي أشبه بالعسل
نازل علي الجبين والقورة
وأكبر تقدير بحب أبنائي
واحترامات منهم موفورة
أنا المعلم
اللي بصمتي علي طلابي محفورة
أنا اللي حقي اتهضم
من قوانين عقيمة ومبتورة
أنا وريث الأنبياء
جاء ذكري في قرآن
وأحاديث مذكورة
امتى ييجى الأوان وتجملوا
للمعلم الصورة
-----------------صافي الجازوي--------------
ليست هناك تعليقات:
إرسال تعليق