ما نخون
عمري مانخون اللّي حبّوني
هوما تاجي هوما عيوني
كيف نغدرهم وما ضرّوني ؟
نغمّض عيني و نتمنّى
الخير للكلّ و نستنّى
وردي تفتّح ونا نتهنّى
في المكنون زادو حطّوني
محال نظلم و نتجنّى
ونمسح ديما دمع عيوني
موزون و ما نكون مهبول
وطيبي كي الدّهر يطول
نرسم ع الخدّ المرسول
و ما نخون اللي خانوني
و اللّي في القلب مسلول
وڨت الشّدّة ما يعنوني
صعب تلوّج ع المنحوس
و الزمان يقلب في نفوس
و البايت يصير معكوس
و عمري راح في الآه و نسوني
الخاين يعفّس ويدوس
هوما رحلوا بعيد وخلّوني
النحل في شغلو مزروب
والعسل يطلفح في كوب
والمحبّة شريان معطوب
فصلوا عروقها وجعوني
ورد الڨنديلة ولّى محبوب
قطفوه م البستان وحرموني
عزّك.والله و شدودك
وراحة بالك سحر وجودك
و صبرك ع الموجوع و قودك
و ربي يكون في عونك و عوني
والخاين يغدر في مجهودك
و ننسى كل اللي جرحوني
هذا قلبي الموجوع
يسيل الدم وذياب تجوع
عل الأرض صيودة وضبوع
ياقف قلبي ...آه مرجوني
والراجل ما يعيشش في خنوع
ارحل يا كاسر ممّو عيوني
خوذوا روحي و المجهود
واتركوا الوطن موجود
ماتبيعوا واشروا الجد والجود
اتركوا الوطن و زيدو بيعوني
وما يزايد عليه المسعود
الجنود تحميه ويحموني
مهما تقوى الريح
ما تبيع المراكب للريح
وابق كيف الوتد صحيح
وماتقول الصيودة كلاووني
إنت الشديد عمرك ما تصيح
وتعافر وصمودك مڨروني
عمري مانخون اللّي حبّوني
هوما تاجي هوما عيوني
كيف نغدرهم وما ضرّوني ؟!
الشاعرة حميدة بن ساسي
ليست هناك تعليقات:
إرسال تعليق